Ir mechtiger konig groiß und rich
Ir must nu werden den armen glich
Wan yr süllent noch bůde
Sterben wie ander lüde
Daz urteill got selber gegeben hait
uber yeglichen mentschlichen staidt.
Daz sie mußen in der erden
Widderumb tzü eschen werden
(Der dumherr)
Her fürt dů stolizer dümherr
Dü besitzest nü und nũmer mee
Dyn pfrund rent güld uñ gút
Dar vor hetrestu dich nvt behudt.
Troist dich selbst wan du müst sterben
Uñ magst nyt lenger tsijll erwerben
Laiß dyn dedyng und kom herfort
Dich hait keyn bede noch suße wort.
(Der wirt)
Her wyrt her wirdt von bingen
An dyßen reyen must du nu springé.
Vil boßheit hast du begangé
Myt falscher spijse und myt wyn langen
Du hast gehalten lüde allerley
Dye mit flüchen und schweren hatten eyn groiß geschrey.
Des bist dü eyn ursach gewesen
Bit goit das dyn sele moge genesen.

Du bruder salt nů myt myr gain
Uñ salt doch goit ym hertzen hain.
Du hast ane sunde gefurt dyn leben
Zů gottes dienst dich gantz ergeben
Und hast gesuchet nyt mere
Dan dyn heyle und goittes ere
Du hast uber geben willen uñ eygenmudt
Umb gottes willen das ist dyr guit
(Der hantivercksman)
Hantverckesman und auch dů leye
Kumme nü auch an mynen reyen.
Du pflechst abents lang tzü wachen
Kleyder belz und schůwe tzü machen
Gelden verkauffen lenen borgen
Wenig vor die sele tzu sorgen
Bys du kommest in lybes noit
Und dich holt der bitrer doit
(Der doctor)
O groißer meister von pariß
Werent ir nu gewest so wüse
Uñ hettent studeret off den doit
Sicherlich das were uch noit.
Ir mußene nu glych dem leyen
Spryngen myt myr an dyßen reyen
Uñ dar zu uweren geyst off geben
Wy woil yr meynet noch langer zů leben.
(Der doit von allem staidt)
Nu kümmet her fürt von allem staidt
We sych hye vor dißer dantze nyt en hait
U wer iste vijll ich bin alleyn
Doch ůberwinden ich uch alle gemeyn
Uwer tzijt ist kommen yr müßet sterbé
Langer tzijt mogent ir nyt erwerbé
Synt yr gottes frunde das ist uch güt
Ist des nyt so fart yr in der hellen gluit.